Author: joorut72

CEO and Founder of Greenland Invest, 4x former Cabinet Minister, former Member of Parliament and former Mayor of Southgreenland, Kommune Kujalleq. I am proud to be the father for our four children, three boys and one girl. I am proud to have a beautiful and intelligent wife, who is an inspiration to me every single day. I am also proud to be a Greenlander, proud to be part of our endeavours to become an independent nation state. My passion is to be part of making this country a better place for our children and their children, to be part of our nation building process. A passion to make a difference, a positive difference. To be loyal to my people and to our country - in whatever I am part of, and To do - whatever I do - from the heart...

Vivian Motzfeldt Nersornaaserneqarpoq kuultiusumik

1. Ukiatta unnuaani
nunaga asasara
kisimeeqatigivakkit
unganartingaarlitit.

2. Qaammatip seqerfigaatit
qatsungaarsuartumi
qaqqatit kusanavimmik
tarranitsiterlutit.

3. Meeqqama perorfigaatsit
uummariffigalutit
kissangaartaqaanga aamma
kiffariumaaritit.

4. Sarsuapput eqqarsaatit
asasara pillutit
najuinnarusoqaakkit
naggataa tikillugu.
Christian Motzfeldt

Ittup, Atsiaap, taalliaa nalissaqanngitsoq aallarniutigilaarpara isumaqaqimmat, nalunnginnakkulu panimminik qanoq pingaartitsigisoq, naak maanna taamaalinermini taamatut oqaasertaliisinnaanngikkaluaq.

Ullumi tulluusimaaqaagut, ila ila tulluusimaakulooqagut Nersornaammik kultiusumik tunineqaravit.

Arnaavutit silassorissoq, pinnersoq, unneqqarissoq, uteriittoq, qitornatsinnut anaanaalluartoq. Nuliaalluartoq, politikkereq tatiginartoq, sullerissoq. Inuit tamarmik, pingaartumik sanngiinnerusut, naligiimmik, torersumik, inussiarnersumillu, sullinneqarnissaannik pingaartitsilluinnartoq.

Nalunngilara ullumikkut maani ilagerusutagut amerlagaluaqisut, minnerunngitsumik Ningiukkut Ittulu, ila qanoq tulluusimaartigissagaluarpa Ningiu Ruthi, panini imminermisulli uteriitsigisoq taamak pineqarmat. Aamma qatanngutitit tamaavim-mik nalunngilara pisoq manna peqataaffigissallugu assorsuaq kissaatigigaluaraat.

Taamaassinnaanngilarli, taamaammat maaniittugut nuannaaqataalluarnissatsinnik tamavimmik kissaateqartut nalunngilara. 

Taamaammat meeqqavut, ukuarput, ernutarput ilaquttavullu peqatigalugit nuannaaqatigissavatsigit. Pilluangaarit – Asavatsigit.

Uiit
23. september 2021

Uanga Vivian Motzfeldt piukkunnerpaavara.

Amerlanerit ilisimavaat siusinnerusukkut ukiuni amerlasuuni politikkikkut sulinermi Inatsisartuni, Naalakkersuisuni Kommuninilu peqataanikuusunga, kisianni ilittut ittumik siornatigut takunikuunngilanga.

Ukiut arfiniliinnaat ingerlaneranni Inatsisartuullutillu, Naalakkersuisuuvutit Inatsisartullu Siulittaasuattut tamanit katersuuffigineqarlutit qinerneqarlutit.

Arnaavutit nukittooq, timikkut tarnikkullu. Qitornatsinnut sisamaasunut anaanaalluartuuvutit – aamma ilinniarluarsimasuuvutit, ilami kukkunerussanngilaq oqassalluni meeqqavut kissumiaatigalugit ilinniakkannik ingerlatsiinnarnak naammassinnittaravit.

Ukioq kingulleq Inatsisartut Siulittaasuattut – allanit sallerpaallutik, demokratiimik tunngaveqarluta ingerlatsinitsinni pissaanerit pingasuinngorlugit aggorneqarsimanerat – ilaasa ataqqiunnaarlugu ingerlatsileraluarnerat, illit Inatsisartoqarneq sutigut tamatigut illersorlugu suligavit, Inatsisartoqarnerlu ajugaatillugu – soorunami.

Taamaammat aamma ukiarmi Inatsisartut tamarmik katersuuffigalutit Inatsisartut Siulittaasuattut qinermatsit, qinersisartuusugut tulluusimaartugut amerlaqaagut. Politikkikkummi sulinermi angusaqassagaanni katersuuffiusariaqarpoq, uangalu qularnanga – piukkutigaarlutit allanullu innersuukkusullutit, aqagu qinersiartuleruma qinissavakkit.

Qanortoq aqagu angusarissaarina.

#Ataatsimoorluta #Peqatigiilluta #Siumut

Asannittumik inuulluaqqusillunga,


Jørgen Wæver Johansen

Asasara Vivian Motzfeldt (Nuliara)

Asasara Vivian Motzfeldt (Nuliara),

Allanit tamanit nalunnginneruvakkit – taamaammat nalunngilara tamatta qularnata qinersinnaagitsigit, aamma Siumumi siulittaasussarsiornermi.

Arnaavutit anaanaalluartoq, ilinniarluarsimasoq, tatiginartoq – suliaminullu  tunniusimalluinnarluni sulisoq.

Unneqqarissutsit, inuillu tamarmik naapertuilluaqqissaartumik pineqarnissaannik tangeqarlutit piumasaqartuaannarnerit – tamanit annermik pingaartitarisat, inuiaqatigiillu naligiinnerusumik inuuneqarnissaannik sorsuuteqartuarnerit ilisarnaatigaat.

Taamaammat naperiaasitsillaqqissuuvutit, taamaammallu Inatsisartuni partiinit tamanit katersuuffigineqartuarnerit tupiginngilara.

Oqaatitsitta nunami maani allaffissornermi salliutinneqarlutik aallaavigineqalernissaannik sukataarlutit ilungersuuteqarnerit – tassatuaavoq inuiaat kalaallit nunaminni – imminnut ataqqillutik – aqutsisuujuarnissaannik qulakkeerinnissinnaasoq. Tamatumani aalajaannerit, sassartunillu allanit piukkunnarnerunerit, qaqugumut attattuassagit nalunngilara.

Nalunngilara qularsaarisorpassuit akornanni maanna sassartutit. Qularinngilarali aamma Siumup ataatsimeersuarnerani peqataasorpassuit sapiissuseqarlutik, namminneq nalunngeqatiginnissusertik, qununatik malikkunikku…aamma taakku katersuuffigissagaatsit.

Partiittami tamanna assut pisariaqartippaa – qinigassallu akornanni illit katersuuffiusussatut piukkunnarnerpaanerit kialuunniit takunngitsoorsinnaanngilaa.

Tulluusimaarpunga takusinnaagakku siulittaasussarsiornermi illit tunngavilersuilluarnerpaallutit – siumoortumik tamanut arlariinngorlugit allaganngorlugit isummannik saqqummiussigavit – qanortoq taakku nalilersuinermi tunngaviugilik, sumi tamaani kikkunnut tamanut neriorsuisaarnerit salliutinnagit.

Tulluusimaaqaanga sassaravit – Piukkunnarnitaavutimmi, tamanna kialuuniit apeqqusersinnaanngilaa.

Qanortoq ullumi angusaqarluarina.
Qanortoq katersuuffiugina.
Qanortoq ataatsimeersuaqataasut sapiissuseqarlutik ataatsimoorusunneq toqqarilissuk.

Asannittumik,

Uiit